莊錠欣闖韓樂壇　薛家燕激讚品學兼優

藝人薛家燕出席活動，她表示不懂打牌，最簡單的「食糊」就識，不過就唔識計「番數」：「好少打，因為好多嘢做，都唔會話有幾個鐘出嚟打牌，不如做啲有意義嘅嘢，係大肚嗰陣時冇得周圍去，啲朋友就同我一齊打吓麻雀，我啲仔女都唔多識。」

曾遇朋友惜錢冇還

她又大爆廿幾、三十年前，有個藝人的媽媽向她借錢，估計是賭輸錢，所以走投無路：「因為都唔係話好熟，應該搵過好多人，我當時經濟唔係話好好，都借咗兩萬畀佢，但第二次就冇再聽佢電話，佢都好似冇咗件事咁，冇還到錢。」

讚莊錠欣唱跳演皆精

講到她旗下的少女組合成員莊錠欣（Elkie）加入韓團出道，薛家燕即大讚她唱得、跳得兼演得，又話Elkie品學兼優：「上年喺《富貴門》度做我孫女，舊年佢同佢媽咪嚟搵我，話有間韓國公司睇中咗佢想簽佢，佢話我擺咗咁多心血栽培佢，但佢又去咗第二度，我話我係令佢成長啫，叫佢過到去，都要搵好嘅學校加倍努力。」

叫大女越洋照住莊錠欣

講到韓國做藝人壓力好大，她直言雖然知會有壓力，但確實是一個難得的機會：「我又有同珊珊（薛家燕大女石祐珊）講，因為佢喺美國學做經理人，識咗好多韓國嘅經理人，有咩事可以搵佢哋幫手。」另外，她又透露Honey Bees的另一成員陳沛妍亦會與洪金寶合作。