娛樂專題：重新出發　崔碧珈無懼全祼

有「G奶謝安琪」之稱的崔碧珈去年突然在銀幕消失半年，原來是因甲狀腺問題令身材暴脹，最誇張時甚至肥到裙鏈都拉唔到，迫不得已將一切工作叫停。但大病未有令她意志消沉，反而積極善用時間在網上學習！她更表示康復後將在事業上繼續全速前進，若可為青春留倩影，不介意全裸拍寫真！

健康忽視

「人間胸器」崔碧珈（Anita）前年出道後，先後獲賞識接拍多部電影，可惜去年因一場大病令她的工作停滯不前，幸其戲份較重的《辣警霸王花》、《老笠》及《PG戀愛指引》等都於今年才上映，大病初愈的她剛好趕上宣傳期，在猴年大展拳腳！

談到去年甲狀腺出現問題，Anita表示所有事都來得突然：「最初係有啲生理問題，月經突然一個月冇嚟，初初因為工作忙所以拖住冇去睇醫生，之後兩個月都冇嚟就覺得唔對路，去睇醫生驗咗好多嘢，試過打通經針，連驗孕都試埋，但都係唔得，結果轉介咗去醫院做深層啲嘅Body Check，驗血先知係甲狀腺有問題。」她表示初期一兩個月都沒有請病假，堅持出席活動，但後來水腫問題愈見嚴重：「我都覺得對唔住，仲好記得病假前最後一個Job係華鼎獎，同事搵過好多條裙畀我，都係拉唔上拉鏈。」

錯過體諒

由於Fit爆身材完全走樣，公司為Anita計劃好的夏日大計統統叫停，除了多個活動受阻，更與暑假重頭戲「寫真戰」擦身而過，她坦言夏天對她而言是重要時刻，本應是事業如日中天的時候卻偏偏錯過：「因為個病嚟得好突然，都有諗過點解唔新年先嚟呀？冇咁多嘢做，夏天真係比較忙嘅時候，但自己又控制唔到，都唔怪得自己太多。」她表示在患病過程中最感激家人與公司體諒，經常向她灌輸正面觀念：「佢哋會話既然係被動式又唔係特登，都冇辦法，大家都好體諒同支持，掉番轉頭鼓勵我今年唔得就下年。」

休養增值

但她覺得最可惜的是在帶病的半年中終日無所事事：「因為嗰時冇一個預算可以幾時出番嚟做嘢，以為可以請住一個月假先，休息吓就會好番，當時7月仲有個性感騷好想去，點知都冇好轉過。」她坦言在日復日的等待中，只能轉變心態自我增值：「個病係賀爾蒙問題，所以瞓覺時間需要好多，又冇咩體力去做運動，結果我喺屋企上網搵嘢學，聽多啲普通話同埋英文嘅嘢，亦都睇咗好多唔同電影，如果我知道要抖半年咁耐，我一定會飛出去讀啲幾個月嘅短期課程。」

樂觀重整

問到被迫停工半年可會感心灰意冷？正能量爆燈的Anita笑說：「冇呀！因為依家已經病好咗！當係放病假，而且呢段日子過後令我更加注意健康。」她又指在復工後隨即開行Turbo密密接Job，幾個月前更到韓國拍攝飲食節目。至於早前突然叫停的夏日大計，她透露要再與公司從長計議：「好多嘢都未傾到個位，但都想趁青春影多啲靚相。（試吓半裸或全裸？）多方面嘗試係好事，但我對呢方面未係好了解，如果真係，相信公司會搵最好嘅攝影師幫我留倩影。」

積極運動減磅

Anita在患病期間因甲狀腺問題導致嚴重水腫，身材發福之餘，磅數更暴增至150磅，為了回復美好身段，她在康復後即花了三個月重新操Fit自己：「主要係透過做運動同食得清淡啲去減肥，因為唔想減得太快影響到健康。」她表示最重要是取得平衡及培養良好習慣：「多做運動、食得健康同早睡早起，之後已經減番到110磅。」

床戲真空上陣

Anita復工後首部作品便是電影《PG戀愛指引》，她形容新作是史上最大膽的嘗試：「有一幕床戲係真空上陣，算係成套戲最性感嘅戲服，亦都係我第一次真空拍戲。」