46歲美魔女甄楚倩靠打牌駐顏

30年前選港姐而入行嘅吳婉芳，結婚23年嚟專心相夫教子，係幸褔少奶奶之餘，更加係最強美魔女！佢三十年嚟個樣完全冇變過，乜嘢歲月痕跡、乜嘢肌膚逆轉，完全都唔可以套用喺佢身上，只可以話佢個樣永遠停留都係三十年前，所以你話喇，女人又點會唔羨慕？其實駐顏有術，唔單止食得健康同多做運動，原來打麻雀都係一個保持青春常駐嘅方法！唔係啩？有人辦你睇，邊個？就係甄楚倩！

皮膚如剝殼雞蛋般滑

相交滿天下嘅劉嘉玲，約咗陳慧琳嘅姑奶Gigi、梁朝偉妹妹同妹夫等齊齊開枱打麻雀，連近年非常低調嘅甄楚倩罕有現身！今年46歲嘅甄楚倩，皮膚白滑冇走樣，面色唔錯之餘，睇落去都仲係咁fit！究竟佢點解可以又係凍齡嘅呢？

年輕時人氣一時無兩

其實甄楚倩都算係一個經典！1987年，只得17歲嘅佢走去參加亞視舉辦嘅歌唱比賽《未來偶像爭霸戰》攞埋大獎，之後仲推出大碟《無伴的舞》，成為當時年紀最細但獲得白金唱片嘅歌手，期間佢曾轉投無綫同埋去台灣發展，後來又有傳因為同騎師謝展鵠拍拖，而逐漸少出現幕前演出。

未婚產子勁驚爆

不過最爆嘅係，1998年，甄楚倩突然出番嚟，仲拍咗套三級片《赤裸凌遲》半裸上陣，當時個個都O晒嘴，再O嘴都仲有！2001年佢未婚生子，自此暫別娛樂圈！雖然甄楚倩絕迹幕前，但佢嗰幾首《今天天氣呵呵呵》、《深夜港灣》、《一冷一熱》等等，到依家都係經典，而電台間唔中都會播！