董敏莉月底嫁律師　爆男友三次求婚！

現年35歲的前DJ董敏莉（Monie）宣布即將下嫁拍拖兩年，比她年長15年的律師男友莊耀金，準新娘Monie接受《東網》電話訪問表示：「多謝大家，其實我想低調，唔想畀人知㗎。」她自言結婚不想大排筵席，已得長輩同意下，只會跟雙方家長及親友食飯慶祝，或會旅行結婚。問何時舉行婚禮？她說：「我想呢個月底搞掂，都好似好急咁。（係咪奉子成婚？）唔係，但有計劃38歲前生BB。」又透露不會特意影結婚相，她親自畫了一張兩人穿上禮服背面的卡代通知親友。

唔鍾意鑽戒

問到求婚過程，她表示：「我哋同居咗一年，其實喺大半年前，我哋都傾過結婚問題，男友有問過我想佢點求婚，我話唔好大搞，簡簡單單就得，佢向我求咗婚三次，一次喺厠所，我刷緊牙，佢沖緊涼，第二次臨瞓前，第三次喺客廳睇電視，但三次我都冇即時答應佢，喺第三次求婚後嘅第二日，我話OK就決定結婚啦，只係十幾日前決定嘅事。（有冇求婚鑽戒、花同跪低？）冇，連鑽戒都冇，其實我唔鍾意鑽石，記得18歲時，阿媽送咗隻鑽石戒指我，我傷心到喊，因為唔可以買其他嘢。（男友送乜畀你？）送咗部車，我諗層樓都有我份嘅。」

感謝紅娘路芙

談及準老公由好友路芙介紹，她謂多謝路芙當紅娘，更指和男友算是一見鍾情，她說：「兩年前我單身，路芙成日介紹男仔我識，最終介紹咗呢個男友畀我，嗰晚食飯，路芙好識做，突然話要走人去唱K，我哋好似識咗好耐咁，嗰晩食完飯再飲嘢再食宵夜，返到屋企仲傾通宵電話，但其實佢第二朝要返工嘅。」又指男友雖然大她15年，但保養得宜，而且為人成熟很遷就及愛錫她。