名人：驚老公搞唔掂　Ana R.趕返閨湊B

混血名模Ana R.與Rosemary同場出席活動，問到新婚的Rosemary可會像Ana一樣生番個Baby，她說：「我啱啱先結婚，未有呢個計劃，過幾年先，等Ana有多啲經驗先。（你見過Ana個囡囡Maya未？）仲未有機會。」Ana則謂：「佢結完婚後都好忙，要周圍飛，我今日都係佢婚後第一次見佢咋。（你諗住幾時生第二個？）等Maya一歲之後，先計劃生第二個，兩個小朋友嘅年齡差距近啲。早前先幫Maya喺一間私房菜度舉行咗百日宴。依家得我老公同個女喺屋企，工人又放假，唔知老公佢搞唔搞得掂，我想快啲完咗活動就趕返去。我諗佢好緊張，我都好緊張，今次係第一次佢同個女單獨相處咁長時間，成4、5個鐘，之前都係一個鐘之內我出去買吓嘢咁。（你復工後慣唔慣？）我依家都會好掛住個女，想聞到佢陣味，同埋會睇佢啲相。」

問到Rosemary的丈夫被指婚後發福脹爆，Rosemary說：「佢婚後好忙，生活唔定時。（但你好fit？）我做好多瑜伽。」Ana即幫口說：「個個老公婚後都會發福，我老公都係，有位識煮嘢食嘅太太，呢個係幸福同埋愛嘅象徵。」