娛樂專題:簡淑兒靠「周身刀」闖娛圈

20160316
東網電視
更多新聞短片
自小熱愛藝術的Jessica,對素描及唱歌均產生濃厚興趣。

組合少女標本成員簡淑兒從美國回流香港勇闖娛樂圈,大學時副修藝術設計的她對畫畫極具天分,別看她年紀輕輕,原來已「周身刀」,不但選港姐、做主持,還獲唱片公司簽約成為歌手,在娛樂圈大展拳腳!

藝術隨心素描

在美國長大的組合少女標本成員簡淑兒(Jessica),早前專誠拜訪由國外遠道而來的藝術家Mark Wigan,她表示自小已對畫畫及藝術產生濃厚興趣,最欣賞可將興趣變成事業的人:「尤其係藝術工作,唔係主流嘢,唔多人識欣賞,所以我好尊敬,成件事好有型,每日起身做一啲鍾意嘅事,又可以賺到錢。」在大學主修心理學及副修藝術設計的她,自言以素描畫風為主:「因為我對顏色唔係咁敏感,所以好鍾意黑白畫,素描係唯一可以令我坐喺度幾個鐘唔郁嘅事,畫畫唔同彈鋼琴,唔一定要好有技巧,只要鍾意,隨心拎起支筆畫啲嘢出嚟,都係一樣藝術品,亦係一種抒發情緒嘅方法。」又自嘲很男仔頭,喜歡馬術、賽車、駕駛電單車及滑雪等活動。

機遇努力爭取

操一口流利英語的Jessica與Mark Wigan侃侃而談,她透露自八歲起便與家人移民到美國生活,三年前才回流返港:「我都識睇中文嘅,因為媽咪驚我唔記得中文字,所以叫我Keep住睇中文書,我都鍾意睇,但寫就好畀心機學緊。我之前做娛樂主持嘅時候要自己寫稿,一開始成篇都係拼音,之後知道要逼自己去學,就用Apps學中文,例如講『你好嗎』,Apps就會出呢三個中文字。」問到美國與香港的生活有何不同,她說:「細個覺得香港好多采多姿,依家返到嚟又唔覺,但香港係一個好多機會嘅地方,只要你肯努力同堅持嘅話,都會有人欣賞,反而外國太大太多人,唔係你想爭取就爭取到,香港係一個發展事業嘅好地方,如果係想住得舒適同玩樂嘅,就外國好啲,但我係搏殺年紀,所以選擇留喺香港。(點解會揀入呢行?)可以話係誤打誤撞,我係選港姐入行,仲要係媽咪叫我選,佢唔鍾意我細膽,希望我可以參選壯吓膽。」她又憶述當年參選時被司儀問及如落選了有何打算:「我話落選咗就返美國讀埋碩士學位,點知TVB就簽我做主持,加上我有個家姐喺香港,佢又好想我喺度陪佢,所以就決定不如試吓喺度發展。」

音樂盡情享受

問到家人是否擔心她從事娛樂圈?她說:「媽咪有叫我做咩之前要諗吓屋企人,爹哋就話做邊行都有是非,只要簡單做番自己就得。(點解會發展音樂?)係一個緣分,其實係呢間公司有日搵我,問我有冇興趣做歌手,我本身都驚青同緊張,係公司畀信心我,加上音樂都係我由細到大嘅興趣,畫畫同音樂都係抒發感情、情緒嘅嘢。(有冇擔心紅唔到?)我覺得已經好好彩,由入行到依家,做到好多人想做都未必做到嘅嘢,所以覺得唔應該去擔心,應該享受當下,有機會唔去試,擔心嚟做乜。」

談到精緻五官惹來整容疑雲,她說:「我唔係標準靚嘅女仔,的確有人問我有冇整容,因為我選港姐時啲相唔靚,選嗰陣嘅妝容偏成熟,所有妝容髮型都唔係我揀,每人得兩分鐘,櫈都未坐暖就要起身,不過依家日日都自己化妝,技巧當然有進步啦!」

選美Just For Fun?

曾參選港姐入行而幸運遇到多個工作機會的Jessica,大談外國人與香港人對選美的不同看法:「外國人嘅角度係Just For Fun,係想挑戰自己,識吓朋友同壯吓膽;而香港通常係要博出名做明星,所以真係好唔同!」

𡃁妹仔So What?

現年26歲的Jessica,一直予人「𡃁妹仔」的感覺,她坦言此狀況令不少客戶對她的工作能力沒有足夠信心:「試過有客話我個樣細個而冇搵我做嘢,但我覺得呢個特質唔係缺點,所以唔需要特登喺造型或其他方面改變。」