林嘉欣老公執導新戲　學友霸氣：理得佢

歌神張學友與林嘉欣早前現身TVB娛樂新聞台節目《StarTalk》，二人大談再度合作感受，嘉欣笑言學友愈來愈靚仔：「拍《男人四十》時，見到學友係歌神，有Fans心態，心裏面有壓力，今次再見番學友就冇咁驚佢，一來自己做咗媽咪，而且又有咗經歷。」而學友則大讚嘉欣進步不少，他說：「嘉欣少咗以前嘅迷茫，依家做足準備功夫，專業咗！一埋位唔使傾就可以演。」

嘉欣每次接戲問准老公

嘉欣今次為導演老公袁劍偉演出，她笑言為老公緊張：「我有問導演角色適唔適合我做，我同佢講唔一定用我，我以角色同件事行先，但導演話寫故仔時已經係諗緊我。而每次接戲，我都會問准老公，佢OK我就OK，咁屋企嘢就可以交畀佢，我哋從來冇因為工作而鬧過交，冇為電影而唔開心。」

學友爆嘉欣突然緊張

而拍檔學友爆料指：「我可以證明佢真係好緊張，之前做咗好多訪問，佢老公唔在場，嘉欣答問題都好自如，但做呢個訪問時佢老公啱啱入咗嚟，佢動作突然多咗好多，緊張起上嚟！而我就完全唔緊張，因為我都冇當過佢係嘉欣老公，我理得佢。」