老公送環保袋　謝安琪爆39歲生日執屋

歌手謝安琪（Kay）出席「地球一小時」熄燈活動，表示今年是第八年參與這活動，現時跟家人亦很注重環保，除了減少浪費食水和電力外，她和老公張繼聰亦開始減少亂買東西：「細個我好鍾意儲郵票、硬幣，阿聰就鍾意儲波鞋或其他紀念品，但早幾年開始我哋唔再儲咁多嘢，愈嚟愈清減，裝修都愈來愈簡單，生活無牽無掛。（囝囝都冇買咁多玩具？）唔係買好多，但學識保存得靚，佢玩完後會一車一車咁捐番出去。」

嫌老公送禮唔等使

而講到Kay日前39歲生日，叫老公送了兩個環保麵包袋當禮物給她，對此她謂：「因為我投訴過佢送啲嘢唔見使，所以今年佢就套我口風，所以我就叫佢送兩個袋畀我。（佢之前送過咩唔好使？）有年我叫佢送部相機，但我只係想用嚟同朋友自拍，以為佢會送啲自拍神器畀我，點知佢送咗部單反同腳架畀我，佢諗錯晒，可能想我學門影相手藝。所以今年就問定我，個袋係冇門市買，要上網鬥快搶，畀佢搶到好開心。（除此之外，佢點同你慶祝生日？）冇呀，留喺屋企執屋，因為其實平時佢返到屋企係乜都唔使做，成個大爺咁，我唔使佢做，嗰日本身佢以為同我着靚靚去街，但我就話想留喺屋企執屋，未試過兩個執屋，所以就一齊執屋，都幾warm，係件好事。」