阿女成駁嘴王接班人　吳君如咬脷忍笑

影星吳君如出席活動，被問早前丈夫陳可辛與女兒陳是知在街頭「過招」一事？她說：「幾好呀，佢兩父女成日過招，個女練埋啲武功無用武之地。時間飛逝，眨吓眼個女下個月就10歲，時間好寶貴，我依家唔使開工就黐住佢，好珍惜同佢一齊嘅時間。佢好動，鍾意跳舞、打功夫同運動，尋日先成家人陪佢去跳舞比賽，不過我冇去。佢好似粒電芯咁要放電。我盡量想佢文武雙全，想佢文靜啲，佢鍾意唱歌，跳舞，坐唔定，迫佢學彈琴同畫畫，但係有啲困難。（會唔會教到好勞氣？）都幾㗎，今日佢要考試，我尋晚同佢溫習溫到10點幾。依家社會風氣係咁，家長、老師同補習老師都大壓力。我好少同佢溫習，我個吊鐘就會響，好失儀。我頭先都想問佢今日考成點。」

老公陰聲細氣唔捨得鬧

談及復活節，君如說：「放假又要同佢放電，去主題公園，我同佢講話阿媽啲骨頭都散散哋，有力氣都會陪佢。其實佢乖嘅，個個父母都會覺得自己啲小朋友聰明同得意，佢依家識得駁我嘴，冇幾多個人可以駁到我嘴，佢駁嘴駁到我好開心，但我又要咬住條脷、忍住笑。（唔會體罰？）唔好喇，要平衡佢嘅情緒，唔知佢幾時受唔到壓力，我哋喺壓力中成長，又唔可以用我哋嗰代嘅方法對佢。（會唔會特登嚴厲啲？）都會，小朋友最驚冇得玩，我會話成個暑假唔准去第二度，不過我得3分鐘，所以成日畀老師投訴我唔夠堅持。（你同老公邊個做衰人？）我老公陰聲細氣，唔捨得鬧，我把聲粗線條，大家都明啦，唔好問喇！」

睇好城城攞金像獎影帝

另外，提到網上發現疑似今屆金像獎得獎名單，當中由郭富城及楊千嬅分別奪得影帝影后。對此君如說：「邊個攞都一樣，個個演員都付出過努力，睇吓好唔好彩。（你心水係邊個？）我覺得郭富城應該攞，論資排輩都到佢，佢又真係好努力，係個好努力嘅演員，我覺得佢勝出嘅機會好高，其餘嘅就唔知。年年都有呢啲風吹出嚟，可能係有心人整出嚟等大家多啲留意，未必係100%準，當宣傳。」