王浩信做圍頭佬　網民驚嘆：有喜劇細胞

劇集《EU超時任務》剛播出冇耐就引起唔少網民話題，除咗有女神朱千雪令一班宅男落足眼力外，早前藝人羅樂林連死N次亦受關注，足以吸引大家坐定定九點半開電視！已經播咗四集，網民好快留意到原來人稱「Signal Wong」嘅男主角王浩信亦「劇」力萬鈞，今次佢雖然第二次做男一，但明顯演技成熟，有網民更指：「唔通呢套係佢上位之作？」

被讚入型入格

劇中王浩信飾演一名圍頭佬，而佢就將大家心目中嘅圍頭佬形象無限放大，首先操得一口流利圍頭話，一時嬉皮笑臉，一時又大方闊綽。平時佢造型往往都係西裝皮鞋襯花花裇衫，雖然「土」味十足，不過就霸氣外露！

似黃子華關禮傑

對於王浩信呢種浮誇演技，網民不但唔覺得反感，反而驚嘆佢有喜劇細胞，網民話：「搞笑得嚟都有啲味道！」、「睇見佢笑到四萬咁口，搞到我都好想笑！」仲有網民將佢同男神黃子華喺神劇《男親女愛》上嘅演出比較，嗰種輕挑態度絕對有幾分相似。此外又有網民發現王浩信呢種演法又有啲似劇集《愛我請留言》中嘅關禮傑，又係「傻吓傻吓」，幾分小人又幾分老實。

實力被網民認同

喺2013年獲《飛躍進步男藝員》嘅王浩信，實力一直被網民認同。不但喺去年劇集《樓奴》上交足內心戲，佢曾喺劇集《名媛望族》中被藝人劉松仁連摑13巴亦被網民翻Loop，睇到觀眾心都痛埋，而佢更自爆被摑到顎骨移位，認真有專業精神！

網民有話兒

Kexxx xxxx：Signal Wong 向佢偷師都唔出奇！

Six xxx xxxx：可以拍得上黃子華！

Kix xxx：戇戇直直咁，幾可愛！

你xx：霸氣外露呀，近年少有咁有喜劇細胞嘅演員

全xx：佢都算喺圈內捱得耐喇，依家先開始上位