紅地氈：楊千嬅鄭中基前後腳到場

藝人楊千嬅和老公丁子高在文化中心出席《第三十五屆香港電影金像獎頒獎典禮》紅地氈環節。

身穿淡雅粉色晚裝到場的她Slim爆亮相，其衣着近睇更有See Through效果，甚有驚喜。她坦言為今日落足苦工，除節食外，更每日用四個鐘頭狂做運動，認真勤力。

對於今屆由劉青雲擔任司儀，上屆做司儀的千嬅就指對方不會有問題：「佢資歷深厚，仲有好多朋友喺下面，佢講乜都得！」另外，千嬅舊愛鄭中基就前後腳踏上紅地氈，其老婆余思敏亦以低胸裙上陣，非常性感。

談到千嬅衣着為何不太性感，她即笑謂：「以前試過都冇乜野睇！其實自己為咗呢條裙都刻意減磅。」問仔仔是否都知道她有份提名爭影后，她笑謂：「知，阿仔見到有化妝師上嚟就開始面黑黑，我就同佢講聽日同你去玩。（唔帶埋佢嚟？）唔帶啦，咁多嘢顧、咁緊張，怕佢周圍捐捐人裙底，睇佢老竇老母係咩人就知佢都活潑啦！」而丁子高就透露自己都有份幫老婆揀裙，準則中最重要是凸顯老婆的身體線條。