39歲敖嘉年封盤做老襯　加拿大秘婚

近期娛圈秘婚浪接浪，憑劇集《巾幗梟雄之義海豪情》中「排骨仔」一角彈出、現年39歲的敖嘉年，原來同樣已與圈外女友秘密結婚！入行多年的嘉年一直鮮有緋聞，他坦言明日是與太太相戀16周年紀念日，故大膽「洩蜜」爆出「升呢」人夫的好消息。

從在外國拍攝的婚照所見，兩夫妻甚為合拍，雖然沒有十分親暱的舉動，但從嘉年拖到敖太玉手實一實，以及臉上流露的笑容，幸福之情不言而喻！

加拿大低調圓婚

作風低調的嘉年受訪時坦言，由拍拖至結婚均被另一半下「封嘴令」：「太太喺外國長大，唔鍾意我講感情事，所以我好少提。（點求婚？）唔好講喇！（加拿大行婚禮？）冇圈內人嚟婚禮，淨係家人食餐飯。我哋唔係大富之家，唔需要搞大龍鳳。」提到明日是兩人相戀16周年，嘉年笑言平時愛遷就太太及送驚喜：「佢聽日都要開工。（畀咩驚喜佢？）我雖然唔太浪漫，但驚喜平時都會做。（點維繫感情？）遷就吓，都係我遷就佢多！」

生B順其自然

問到有否打算生BB？他坦言隨緣：「家人又冇催我哋，唔需要特別有呢個重擔。我媽仲話唔使生啦，好辛苦！我又冇咩所謂。（同太太設下目標日後生BB？）冇諗過。」