84歲劉兆銘 重出江湖拍劇自責太醒
講起現年84歲嘅劉兆銘(Ming Sir),相信都冇人唔識佢,皆因佢咁多年實在送咗唔少電視汁畀大家撈飯,而佢出名嘅劇集作品,係咁易都數到有《笑傲江湖》、《儂本多情》、《新紮師兄》、《流氓大亨》、《誓不低頭》、《今生無悔》、《馬場大亨》、《創世紀II之天地有情》、《富貴門》等。
係咪套套都喺你嘅腦海度「情根早種」呢?不過可惜,銘Sir唔知係咪因為年紀大嘅關係,2011年已經冇再拍劇,可以話係觀眾嘅損失。不過戲癮呢家嘢,隔幾年總要發咗一吓,就算係年過八十嘅演員都唔例外,呢日,以顧問身份喺灣仔出席舞蹈團發布會嘅銘Sir,就話即將參演由王晶擔任監製嘅無綫新劇《賭城群英會》嘅拍攝工作,對於相隔三十五年再演「仇大千」,佢就自己都搞唔清楚有咁耐,仲話:「我相隔廿年(呢個其實係錯㗎)再演仇大千,今朝先應承王晶去拍。」
雖然數口唔精,但銘sir對自己依然信心爆棚,對於要再與謝賢演對手戲,佢就好搞笑咁話:「謝賢喺劇中好醒,我角色要蠢過佢,但我本人又好醒。」咁言下之意,係咪即係話謝賢...唉,相信銘sir都只係玩吓,小編唔應該自行想像太多嘢出嚟嘅。