唐紫睿認殺氣重　鄧穎芝勁憎Winkie！

喺6號開台嘅Viu Tv，主打真人騷節目，除咗充滿話題性嘅《跟住矛盾去旅行》，仲有充滿火藥味嘅《G1格鬥會》。

尋晚《G1格鬥會》就開播喇，8個女仔都出晒場，唐紫睿（Hazel）、龍小菌、黎美言（Winkie）、鄧穎芝（Vangie）、郭思琳、劉燕妮（Rika）、鄧洢玲（阿旦）及王蘊妮。成個鐘嘅節目，頭四十五分鐘都係介紹吓同度高磅重咁，冇乜料到，到最後就終於有上擂台嘅場面喇，畀人打到塊面又腫又瘀嘅Rika，哭訴隻眼睇嘢有黑影，而其他女仔就槍口一致對準Winkie，一向率直嘅Vangie就講到明：「睇清楚佢份人，我係好憎佢！」講到最有殺氣嘅非Hazel莫屬，佢對眼勁有火咁話：「依家我繼續留喺呢個節目嘅目的，就係要幫Rika報仇，我要佢（Winkie）十倍奉還！」

Hazel失理智喪打

Hazel喺《G1》播出後，就喺instagram上載截圖，好感觸咁寫咗一大段文，佢話當時諗都冇諗就接咗個節目，點知原來訓練嘅過程係咁辛苦，佢話：「雖然明知這一關很難，但我的心裏當時只有一句說話：放棄了我一定會後悔。」過程經歷爸爸中風入院，但係都冇令佢沮喪，反而更加有鬥志，佢話：「我咁大個女，未做過一件令老豆（竇）驕傲的事，而（依）家佢瞓喺醫院，我好想威番一次俾（畀）佢睇，一次咁多......」之後佢又話上到台，會幻想自己一隻獅子：「第一個踏進八角籠的選手，面對一個巨人，心裏不寒而慄......我當時腦海裏只有我的家人，我知道我能為他們做的就只有，贏這一場比賽！！！我開始幻想自己是一頭獅子，而對手是將要傷害我家人的野獸，我開始喪失理智，感覺殺氣在身體流動。」好得人驚！

而成為犯眾憎嘅Winkie亦有update ig，佢留言話：「既然開始了，就不可以停下來，人生就是一場良性競賽，要堅強，所有的事情都能鍛鍊我成為更堅強 , 加油 ! 黎美言」

一班女仔埋身肉搏，雖然好得人驚，但不論節目中嘅肉搏定節目外嘅不和都似乎好有觀看性。