行山遇「彩虹圈」　朱慧敏嗌：UFO？

藝人朱慧敏（Queenie）近日好事連連，仲連番遇見幸運徵兆，尋日去咗行山嘅佢就恰巧睇到一個千年難得一遇嘅「彩虹圈」，期間Queenie更即瞓喺地下，用手機影低呢個絕世美景，其後佢接受《東網》訪問時就表示自己當時一度難掩興奮之情，邊望邊大叫「好靚！」、「彩虹啊！」：「嗰陣大概十二點半，我同個朋友行行吓山嗰陣，就見到前面有幾個Auntie抬頭望天又影相，之後我就見到呢個景象，我當時見到個心情好興奮，而我第一個反應就係問我身邊嘅朋友：『哇！係咪UFO啊？』之後望多陣我就大叫：『彩虹啊～～』，我真係咁大個女都未見過彩虹可以咁樣，初初見到個彩虹圈係細個啲，之後一路睇就個圈就一路變大，係好工整好對稱！」

養咗八年鐵樹開花

其後，Queenie又提到家中養咗八年嘅鐵樹終於開花，仲一開開足十幾朵，雖然佢喺網上資料搵到此乃不祥之兆，但亦無礙佢嘅心情，其後佢仲話；「養一棵植物當然就希望佢可以開花結果，依家仲要足足隔咗八年都開到花，我真係好開心，仲同佢影咗好多相！『鐵樹開花，富貴榮華』嘛！」