Kay戲屎勝在吸睛！網民神回：交畀嘉穎演

20160412
  • 東網電視
    更多新聞短片
    Kay BB首次處女下海擔正，網民嘅反應有讚有彈。
    無綫新劇《殭》噚晚播出第一集，劇集播出之前，網民已經勁期待呢套講殭屍嘅劇集，話好有亞視經典劇《我和殭屍有個約會》嘅感覺！此劇一出，果然引來好大回響！當中有彈有讚咁啦，有網民大讚劇集入面嘅CG場面做得相當唔錯，喺荷蘭取景又夠靚，當然女神謝安琪（Kay）又夠索！不過，都有網民批評首次擔正嘅女神Kay，彈佢啲戲實在係有啲差，仲話佢嘅女神形象破滅添！
    女神Kay擁特異功能
    其實《殭》呢套劇主要就講鄭嘉穎飾演嘅「刑活著」係一個不死人，仲已經生活咗500幾年！第一集就遇到女神Kay飾演嘅「藍夢南」，唔好以為女神Kay係凡人，雖然未講佢係咩身份，但係女神Kay有一個特異功能，就係「一指靈」，可以同屍體對話一分鐘，仲可以令啲死咗人或者動物翻生一分鐘，係咪好離奇？真係令人摸不着頭腦囉！
    演技被彈生硬
    另一樣令人摸不着頭腦嘅嘢，就係女神Kay嘅演技。唔知係咪女神因為首先擔正，所以太緊張，網民話覺得佢演技太過生硬，同埋扮可愛扮得過咗少少火位咁，仲叫佢跟佢老公張繼聰偷吓師，學吓做戲喎！不過不過，有彈就有讚啦，有網民一於開口撐女神，話阿Kay本身係歌星，又唔係專業演員，演到咁已經好好，讚佢有新鮮感兼夠清新添！
    謝安琪陳凱琳交鋒會點？
    而套劇嘅另一女主角陳凱琳就仲未出現，由於早前網民已經唔多LIKE陳凱琳喺劇集《張保仔》入面嗰把娃娃聲，網民就話真係有少少擔心謝安琪同陳凱琳同場出現嘅時候唔知會點！不過，又有網民搞笑話陳凱琳今次喺《殭》入面嘅角色設定係有「失語症」，雖然佢應該係會好番，但係網民話都可以唔使聽佢講嘢一陣，覺得好慶幸喎！
    網民有話兒：
    木亥XX：眼皮開得太深啦，又大眼，棚牙又假又激白，仲要墊到36e....其實恐怖過d（啲）殭屍！
    獅子XX：人地（哋）係歌星，唔係專業演員，算ok，有新鮮感幾凊新！
    Kabaxxxxarry：佢企係（喺）度已經夠，好吸引，演交俾（畀）嘉穎。
    lxx012：佢老公（張繼聰）好戲好多，偷下（吓）師啦！
    Kaby11xx：個景好靚，啲CG都做得唔差，其實抵讚！