【留鬚＋長髮】鄭嘉穎激似元華！

無綫新劇《殭》繼續熱播，喺第一集一出街嘅時候，網民都將重點放晒喺處女下海做女一嘅女神謝安琪（Kay）身上，對佢嘅表演有讚有彈，有網民發現大家好似遺忘咗改圖常客鄭嘉穎，於是開post希望將觀眾目光放返喺被「滄海遺珠」嘅呢位視帝級男一身上咁話喎！

首先第一個開心大發現就係，嘉穎原來好有潛力成為「元華接班人」！佢喺劇中飾演嘅角色「刑活著」擁有不死之身，已經生存咗喺呢個世上足足500多年喇，嘉穎喺入面幕幕都chok到世界盡頭，蠟住個「蛋撻頭」殺殭屍，留長頭髮之餘又留鬚，咁有心機嘔心瀝血諗個造型出嚟，本身以為好有型啦，點知！！！

網民笑五百年冇洗過頭

網民發現長頭髮兼留鬚嘅嘉穎同元老級武打演員元華係一模一樣樣架，冇錯係一模一樣呀！網民仲好有心機將嘉穎劇中cap圖同元華前輩嘅大頭相拼埋一齊，簡直似到好似孖生兄弟咁款，如果有得就咁玩swap face的話，結果一定毫無違和感囉！其實嘉穎之前又拍過《拳王》，仲主演過內地劇集《葉問》，泰拳呀、詠春呀都唔會難到佢囉，要做元華接班人？Easy job啦！仲有網民話嘉穎劇中髮型太「油」，忍唔住問佢係咪掛住殺殭屍，搞到五百年都冇洗過頭，認真爆笑！

嗌出一片天

另一個開心大發現就係，網民驚覺視帝級嘅嘉穎主演嘅多套劇入面，都有佢嘅招牌神級「喪叫」，由《鐵馬尋橋》大叫一聲「啊！」嗰一刻開始，「啊！」已經成為嘉穎嘅代名言，亦即係「啊＝鄭嘉穎」咁解，除咗引發改圖潮之外，仲有創意無限嘅網民將「啊！」改成remix版、cut成mp3鈴聲，又將「啊！」mix埋李逸朗哭腔版《傻女》，效果真係笑死人冇命賠呀！其實除咗「啊！」之外，嘉穎喺《與敵同行》創下金句：「係你嫁禍我架！」亦是佢嘅代表作之一，不過當時嘉穎都算係遇上勁敵喇，皆因另一男主角郭晉安加入戰團一齊嗌到拆天，你又嗌吓我又嗌吓嘅場面相當經典！

網民有話兒

Yanyanxxx：真係好似元華呀，直頭可以做元華接班人啦，不過我諗元華好打啲掛！

LamKaxxx：我第一集一開頭就覺得佢似元華啦，原來唔係得我一個咁諗，好感動呀！定係其實男人長髮留鬚都係元華咁樣？

WilliamXXX：啲CG係有啲假，唔否認係會有不足，但係殭屍片題材都不外乎係咁啫，唔通真係人力鬥殭屍咩、吓吓都畫符道士出山咁咩？

Dinxxx：見到鄭家穎個樣，個腦就有植入式廣告出現，仲要有聲...218xxx...

Andyxxxx：終於明點解之前陳凱琳拍《張保仔》會係咁嗌，可能佢男朋友教佢！