東方日報C1:無綫晒冷騷谷myTV SUPER
無綫昨晚全台總動員晒冷,力谷新服務myTV SUPER,視帝黎耀祥、視后田蕊妮及胡定欣等出盡渾身解數,為TVB省靚招牌!眾星排排企晒冷影大合照,陳豪、黎耀祥、鄭裕玲及汪明荃齊齊企頭排,備受重視的祥仔激讚公司人才濟濟,將繼續享受電視盛世!

無綫昨晚在將軍澳電視城直播《myTV SUPER呈獻:萬千星輝睇多D》,節目由鄭裕玲、農夫及林盛斌(Bob)擔任大會司儀,當正活動是台慶大騷!視帝黎耀祥以劇集《巾幗梟雄之義海豪情》角色「劉醒」的造型示人,力谷myTV SUPER經典台,他說:「經典台經典劇集夠精彩,如果唔係,我『劉醒』個名掉轉寫!」而視后胡定欣與田蕊妮則與迪士尼人物齊齊登場,蔡思貝、黃心穎等後起姐仔則穿上韓國傳統服飾亮相,梁烈唯及羅天宇亦揮動日本東洋刀造勢,力谷韓劇台及日劇台。

王君馨扮性女勁尷尬

對於企頭排備受重用,黎耀祥說:「我有社交驚懼症,怕人多,近年都係企前咗,但感覺好似唔知點咁!(受重用會提早續約?)仲有兩年,未有咁快,未有人同我傾。我唔受重視,公司人才濟濟,有好多後起之秀,例如陳展鵬都係視帝之選。(你唔扮柴九?)劉醒個妝最易搞,做柴九要剃頭,做豬八戒仲麻煩!(最鍾意劉醒?)係,無論係角色定劇本,但依家冇辦法搵番呢個班底,李添勝都退咗休啦!」而胡定欣和田蕊妮則與迪士尼卡通人物亮相,阿田笑說:「我好似公主咁呀!我都係做番本份啫!(喺另一半心中係公主?)我係奴婢!」

此外,大會播出陳敏之、張兆輝、江美儀及王君馨等合演、以「性」為題材的劇集《性在有情》,敏之說:「我飾演性治療師,學到好多嘢!」江美儀笑說:「我現實中好有經驗,但喺劇中要扮零經驗,非常突破!」至於「處女黨」王君馨則尷尬地說:「我完全冇經驗,但係要喺套劇度演到好有經驗!」擔任司儀的C君表示最期待劇中鍾景輝與盧宛茵這一對,陸永笑說:「咁重口味?係我就睇DoDo姐(鄭裕玲)喇!」鄭裕玲聽到即打陸永,並笑說:「知你對我有啲嘢㗎喇!」

心穎見半裸男受「考驗」

另外,大會宣布將復辦香港先生,期間有只穿短褲、半裸上陣的舞蹈員表演鋼管舞,黃心穎心情興奮,笑說:「我會以蠟燭同皮鞭嚟考驗香港先生!大家唔好誤會,我係想幫佢哋影沙龍啫!」

更多新聞,請瀏覽東方日報網頁:
http://orientaldaily.on.cc/