電視製作似流水作業 黃淑儀學習接受新嘢

20160420
東網電視
更多新聞短片
黃淑儀(左圖)嘆依家啲電視節目製作唔夠認真,佢亦指要學識接受新嘅節目話題!

藝人黃淑儀到電台接受吳綺莉的節目訪問,其老公亦一同到場,受訪時吳綺莉慨嘆現時電視業情況:「依家少人睇電視,又有電視台執笠,依家娛樂圈都幾難搵食。」問到可覺電視行業比之前窄了很多?黃淑儀表示:「好多,我嗰陣係兩個台,麗的同無綫,後來先有佳視,但我覺得依家電視冇以前製作咁認真同多元化,依家變咗流水作業。」

攞《大長今》做例子

吳綺莉亦謂以前拍完劇藝人有很多工作做,但現時已沒有。黃淑儀亦以13年前的韓劇《大長今》為例:「《大長今》之前冇人會提咁多韓國嘢,就算韓國車平好多都冇人會用,但呢十年進步好大,《大長今》後開始,好多旅行團睇佢哋邊到拍同整泡菜,所以電視劇製作認真就可以帶動社會經濟,所以呢啲係現眼報,係好嘅回報。」

以前製作認真啲

問到可覺香港被爬頭及落後?黃淑儀坦言:「唔可以話落後,但要檢討吓係咪要認真啲製作,以前拍《茶是故鄉濃》、《酒是故鄉醇》都令好多人去內地睇景,所以製作認真係可以現眼報,好嘅回報,即刻睇到啲後果、報酬。」

有睇ViuTV新節目

而講到最近ViuTV開台,黃淑儀亦表示有看該台,認為該台很後生,亦謂有睇過《真PK》:「要慢慢接受新嘢,如果我係個嘉賓應該會嚇死。(可覺整蠱人過咗尺度?)我會學習接受,點解人哋肯做出嚟?點解有咁多人睇?點解有咁多話題?我唔接受唔得,因為我做呢行要學習接受新嘢。」吳綺莉亦謂:「其實其他國家都有拍呢啲嘢,你唔做人哋做,淨係坐喺度就死梗。」另外,黃淑儀透露現時跟無綫一年一劇,而五月會開拍新劇。