中山亞微梨產後復工　同半歲B女拍廣告

37歲嘅日本女星中山亞微梨，90年代因演出廣告獲封「寶礦力女郎」而走紅，當年更被唔少少男視為女神。不過，亞微梨之後一路喺藝能界發展平平，6年前下嫁前運動員飯沼誠司後，去年10月更為老公誕下B女。休息咗半年之後，亞微梨近日復工，仲同半歲寶貝女一齊拍攝廣告。

亞微梨今日出席記者會，產後首度亮相嘅佢，身型亦冇乜走樣。佢透露拍攝當日，老公都有嚟探班。雖然老公冇上鏡，但就不斷喺攝影機隔離搖玩具氹囡囡。而亞微梨喺廣告中與囡囡全裸上陣，佢話有遮掩重要部位，而且相片畀人感覺好健康，所以都冇覺得尷尬。