新碟大賣　AGA最想返屋企慶祝

歌手AGA（江海迦）出席新碟簽唱會，她身穿紅色露肩上衣及紅色流蘇長裙，隱約騷出長腿。期間她不但獻唱金曲，又跟歌迷大玩遊戲，為男歌迷搽唇膏，之後歌迷又驚喜送花、鋼琴造型的蛋糕及大隻佬手臂cushion，令她十分冧。

新碟銷量直迫一萬張

受訪時，AGA表示今次開第二個簽唱會很開心：「冇諗過可以開兩次，今日同上次一樣都係落大雨，兩次都擔心冇人嚟，但最後都見到咁多人嚟，好感動，同埋今次佢哋送咗個鋼琴蛋糕同我慶祝，好感動，多謝歌迷由出道至依家都咁支持我，愈嚟愈多人嚟聽我唱歌。」講到她新碟銷量直迫一萬張，就快達金唱片，對此她表示：「完全冇諗過，初初諗住有得出碟已經好開心，更加冇諗過係可以金唱片，係好振奮嘅消息，證明原來大家都仲係會買碟支持。（諗住點樣慶祝？）今個星期我差唔多喺錄音室瞓咁滯，喺錄音室時間仲多過喺屋企，因為要同舒文做新歌，所以自己一直冇停過，希望可以抽到一日同屋企人慶祝下，食番餐勁。」

媽媽送驚喜

AGA亦表示希望可以盡快舉行音樂會：「想同大家現場分享我嘅音樂世界，可以搞兩次簽唱會證明都好多人支持我，所以都想報答番佢哋。（係今年內嘅事？）希望盡快，有咁快得咁快，自己都好心急，自己啱啱就好似幫過去三年做咗個小總結，所以想同大家分享。」最後，其母親更以神秘嘉賓身份出場獻花，令AGA十分開心。