東方日報C1:金剛堅決與蕊蕊分手

20160425
東網電視
更多新聞短片
三年情咁就玩完。

無綫藝人金剛與F Cup咪神蕊蕊拍拖近三年,近月屢傳兩人感情有變,但他們一直否認。直至昨日,金剛終忍痛親證本月初已正式分手,神色黯然的他指兩人性格一東一西,曾努力挽救不果,現已搬離愛巢,並強調今次和平分手,絕不涉及第三者。

由台灣轉戰香港的藝人金剛雖然並非走靚仔路線,但憑搞笑開朗性格一樣桃花旺盛。2013年中,他奪得曾推出寫真集、擁有34F勁爆身材的蕊蕊芳心,自此戒除花弗性格化身住家男,熱戀期更不介意高調晒恩愛。金剛曾自爆帶蕊蕊返台灣見家長,可是近數月開始出現情變傳言,他倆曾多次否認,去年底金剛表示兩人仍有一齊瞓。不過紙包不住火,金剛昨日終開腔親證,本月初已向蕊蕊提出分手,一臉無奈!

試過挽救 絕對冇第三者

近期有電影上映的金剛昨日接受專訪,訪問內容自然離不開戀愛狀況,當問及其感情生活,他罕有地面色一沉,起初更不太想回應。經記者再三追問下,他終開腔親證與蕊蕊已於本月初分手,強調不涉及第三者,但對原因不願多談,只表示有努力挽救感情,奈何性格不合經常嘈交,金剛終於決定分手!他透露本月初已搬離愛巢,劃清界線。

記:記者 金:金剛

記:同蕊蕊幾時分手?原因係乜?
金:(沉默了一會)我哋4月頭正式分開,之前成日嗌交,始終大家性格,好多睇法、觀點有分歧,唔想再拖落去。
記:發生過乜嘢問題?
金:(皺眉)其實拍拖八個幾月開始有問題,經常因為好小嘅事嘈交,我係好怕嗌交嘅人,成日係咁真係好攰,糾纏咗一段時間而決定分手。
記:有冇挽救過?
金:都有,大家對呢段感情都好認真,但性格嘅嘢好難改,諗住Tune吓大家諗法,但係最後都Tune唔到,長此落去大家都辛苦,唔想不斷循環再拖落去。
記:有冇第三者?
金:(眼神堅定)冇!一定冇!大家係和平分手。
記:邊個提出分手?
金:係我……(沉思一會)我同佢都係呢個圈嘅人,平時出嚟會成日畀人問對方嘅事,以後大家唔好問我關於佢嘅嘢,依家我哋係朋友關係。
仲認係男友?「我控制唔到」
記:前幾日蕊蕊回應新聞事件時,仲話你係佢男友喎!
金:佢點講我控制唔到,我4月頭已經搬開咗,依家搬咗去朋友屋企住。我立場好清楚,亦都同佢表明立場。(抖一下大氣)算啦!大家都冇可能,再落去只會大家傷害大家,本來就係性格問題,好難改變。
記:之前成日嗌交有冇影響工作?
金:有啲嘅,工作同感情冇得話分得咁開,做嘢嘅心情係有影響,總之希望佢有真正幸福,我自己都會專注番事業上。

其實金剛與蕊蕊的戀情開始得相當奇情,2013年中爆出蕊蕊與周秀娜舊愛陳偉成(Avis)曾暗撻半年,兩人隔空互罵,當時力追蕊蕊的金剛護花心切,寸爆Avis奀星冇風度!其後,Avis極速晒與新歡Yumi(尹蓁晞)合照,金剛亦追求蕊蕊成功。去年底,金剛捲入台灣槍擊案,蕊蕊對愛郎投信任一票。雖然經歷過不少風雨,奈何金剛與蕊蕊三年情始終要告終。

更多新聞,請瀏覽東方日報網頁:
http://orientaldaily.on.cc/