網民熱話:全城嘘爆王蘊妮退出比賽

20160425
東網電視
更多新聞短片
王蘊妮身為香港運動員,掛住呢個名去比賽但就棄權,畀人噓都好合理嘅…

八個女仔加一場拳賽嘅火花可以大成點?就係由場內打到場外,呢頭喺擂台上對打完,嗰頭又喺網上「發功」晒傷勢寫千字文單單打打,火藥味濃到真係隔住個mon都聞到!而Viu Tv真人騷《G-1格鬥會》嚟到第七集嗰陣,仲搞咗場不記名投票,投出八個女仔心中嘅「最喜愛選手」以及「最討厭選手」,早於上集退出咗嘅鄧洢玲(阿旦)以三票成為「最喜愛選手」,而一向被指「犯眾憎」嘅黎美言(Winkie)最後成為「最討厭選手」,深知自己人緣麻麻嘅佢其後仲話得到三票呢個結果比佢想像中五票已經好好!

怕受傷退出比賽

至於喺同一集入面,平時唔太起眼嘅溜冰運動員王蘊妮(Mimi)亦突然成為全場焦點,事關佢喺同對手龍小菌對決前夕,突然於擂台上宣佈要退出比賽,仲喊住解釋話因為自己即將要參加溜冰世界錦鏢賽,怕上到台會受傷,影響比賽表現,令全場觀眾即時O晒嘴,大為驚訝!而其實早喺上台前,Mimi已經向教練講過自己苦衷,但當時教練就指:「諗得太多啦你,會影響比賽,你踏出咗第一步就唔可以回頭!」未料最後Mimi亦選擇「不戰而敗」,令台下嘅教練及所屬團隊亦非常無奈!

網民反應有好有壞

對於Mimi突然退出一事,雖然淨番喺度嘅六位參賽者對此都表現諒解,但唔少網民就覺得佢非常不負責任,仲紛紛留言直斥佢枉為運動員:「唯一的運動員反而最冇運動員精神,一直逃避困難。操練又走堂,上台又臨時縮沙,so sad~」當中,有心水清嘅網民更指Mimi早喺第一集嘅時候就已「漏口風」唔想打落去:「唔知點解要係咁比人打,連我爸爸都未打過我。」不過期間亦有人留言力撐佢嘅決定無錯,始終都要取捨:「佢只係最後做番個適合自己嘅決定。呢場佢堅持去打嘅輸贏都會影響自己嘅溜冰生涯。贏到一場掌聲但會輸咗前途喎,不如將份堅持放喺自己強項!」

網民有話兒:
Lexxxs To:唯一的運動員反而最冇運動員精神,一直逃避困難。操練又走堂,上台又臨時縮沙,so sad~
KXXXX LI:莫講話做運動員,佢咁既(嘅)性格做人都只會注定失敗,唔該佢唔好再掛住(香港運動員) 呢個名係(喺)咀(嘴)邊啦! 影衰香港運動員呀......
Kx Kx Wxxg:都唔知參加黎做乜,之前仲話唔知點解要係咁比人打,屋企人都無打過佢!淨係呢句都知佢廢到無可再廢!
Coxxy Mxxxh:話唔想比人打又唔想傷,咁叫你老豆買部ps4係(喺)屋企打ufc啦!
Sunxx Nx:佢只係最後做返個適合自己既(嘅)決定。呢場佢堅持去打既(嘅)輸贏都會影響自己既(嘅)溜冰生涯。贏到一場掌聲但會輸左(咗)前途喎,不如將份堅持放係(喺)自己強項!

最強娛樂APP《東網巨星》,不時推出最新最好玩娛樂節目,除了早前推出的特備節目《發哥有Say》、《黎明話你知》外,每個禮拜都仲有好多其他精彩娛樂節目。預知未來,相信好多人都希望做到,《東網巨星》APP其中一個重點節目《玄學星相》,除咗教識大家點樣催吉避凶,仲會以玄學角度,幫大家八盡每周娛樂熱話㗎!
最強娛樂APP「東網巨星」下載連結:
http://on.cc/redirect/entertainment