翻唱Eason歌呻難　胡琳頹爆想放棄

歌手胡琳（Bianca）到電台宣傳翻唱歌《葡萄成熟時》，她表示在去年的音樂會中演唱過這首歌，由於音樂會的DVD快將推出，所以她亦要開始宣傳工作：「點解揀呢首歌，係由啲歌迷投票嘅，佢哋睇完我個騷之後，都話最鍾意呢首歌。」又指當時演唱得非常投入，所以自己亦很滿意，但現在回想起來覺得自己很大膽：「首歌本身難度好高，仲要女仔唱男仔嘅歌，男仔音域闊啲，綵排嘅時候我每次都想放棄，因為驚真正演出會比綵排差，好彩最後都冇，出到嚟嘅感覺都幾好。」

讚Eason係魔術師

提到歌曲的原唱者陳奕迅（Eason），Bianca坦言非常喜歡對方的歌曲，更大讚他的聲音有種神奇的力量：「有啲歌畀我唱可能冇咩嘢，但佢唱就好似一個魔術師咁，叮一吓就會有嘢發生，好似講緊個故事咁，所以我好欣賞佢。」問到可有給Eason聽自己的音樂？Bianca指之前出唱片曾將唱片送給對方：「有次宣傳撞到佢，有打招呼同送碟畀佢。佢對所有歌手都好鼓勵嘅，佢仲話會聽我隻碟，希望到時出音樂會嘅碟都有機會再送畀佢聽。」