【咁盞鬼？】黎明開騷有好西食

黎明今次個4D騷，因為種種關係同埋阻滯，未正式開show就已經勁有noise。先係因為牌照問題，第一晚演出要暫時宣布取消。而第二晚嘅show雖然可以如期進行，但就宣布要暫時取消今晚嘅摩天輪環節。

記者喺現場發現一樣好得意嘅嘢，就係呢個show唔單止4D等粉絲可以大飽眼福同耳福，而且仲可以飽口福，因為會場有好多好西食（即係好東西呀！），最令人驚嘆嘅，係竟然有鮑魚、紅酒、白酒、伏特加等等。

據知，呢個高級美食區，只係FOR持有鑽石級門票、即係售價2,980港元嘅飛嘅觀眾，先有得食，而且仲要額外畀錢食。根據現場消息，VIP可以任飲其中一款香檳，至於另一隻較高級嘅香檳，就要配鮑魚一齊買（詳情可見圖附餐牌）。而睇番個餐牌，只要畀八十蚊，就有兩隻鮑魚食，真係一啲都唔算貴呀！