賴慰玲港女變韓妹 網民讚勁Cute!

20160505
東網電視
更多新聞短片
大家又like唔like呢!

無綫劇集《殭》劇情愈嚟愈緊張,正當大家投入緊喺藍夢南(謝安琪飾)同藍夢瑤(陳凱琳飾) 爭奪刑活著(鄭嘉穎飾)呢個不死人嘅時候,有網民就留意到尋晚嗰集有第二個亮點,呢個亮點就係染咗一頭紅髮嘅丘玲梅(賴慰玲飾),話佢好正呀!丘玲梅呢個個角色本來被設定為極不受歡迎,唔知大家仲記唔記得早排TVB搞咗個《殭》最Like人氣女神選舉,嗰陣時由陳嘉寶(Anjaylia)由頭帶到尾,而賴慰玲就慘慘豬包尾,不過網民搬龍門嘅速度仲快過刑活著殺殭屍嘅速度,個龍門話咁快就搬咗去賴慰玲度,網民仲跪求TVB要好好捧佢添!真係估你哋唔到喎!

一聲「Oppa」冧死人

話說噚晚嗰集,丘玲梅為咗要冧掂龐杰(胡鴻鈞飾),於是決定幫自己轉形象搞搞新意思,仲搵埋何年(黃又南飾)畀意見。見佢造型轉下一個轉下一個,最後一個韓妹Cute Cute造型,連平時係死對頭嘅又南都睇到呆咗,之後賴慰玲嘅一聲溫柔嘅「Oppa」更加係一洗港女形象,成功冧掂一班網民,果然係撒嬌的女人最好命,亦都好鬼正!

演技超羣超班

其實網民話除咗覺得佢夠Cute之外,佢嘅演技仲更加抵讚,網民話演藝學院畢業嘅佢一直都係高材生!之前佢面試無綫套劇集《女人俱樂部》時,已經一人扮演七個角色,演技超羣架!不過,早前網民明明話佢喺《殭》入面又嘈又港女架!咁點解釋先?有網民就話,佢個角色設定係煩,而你又真係覺得佢煩,呢啲咪好戲囉,戲呢啲嘢,你識條鐵咩?大家學到嘢未呀!

網民有話兒:
Kxn Lxx:講真佢不是太靚,但演技真是無得彈,一D(啲)都不像新人,起初都不太想看她,但演技很自然,越(愈)來越(愈)想看。
Raixxx Ip:其實佢都ok,演藝學院時已係高材生,拍女人俱樂部仲教好耐無(冇)做戲既(嘅)李麗珍添!
Sxxxy xxx:M club interview佢一個人扮哂七個角色喎,梗係正啦,其實佢有做開舞台劇既(嘅)~
Axxxs Lxx: 將來睇好佢會有實力做花旦,拎埋最佳女主角~而(依)家只欠一個機會同年資。
Hxxe Yxx Yxx:我覺得佢個樣同鄭嘉穎嘅前女友周麗淇有啲似!