李旻芳真空晒半球　網上人氣急升

無綫藝人李旻芳（Lucy）繼早前採訪日本熊本地震災區後，近日在劇集《火線下的江湖大佬》扮演一樓一鳳姐，再贏得網民關注，其實Lucy曾真空晒半球拍攝型格靚女相，可塑性之高真係估佢唔到！她說：「張相係影嚟做Portfolio，睇吓唔同形象可唔可以Carry到。（想人認識你多啲？）我都留意到網民討論我喺《火線》做鳳姐，開頭覺得又畀人講，諗深一層都唔係壞事，代表大家開始留意我，而且都有人讚我演得好，仲話因為呢場戲做咗我超級粉絲，我會繼續努力！之前採訪熊本地震獲贈食物件事，多謝網民提點，我會將意見消化，希望做得更好。」

Lucy希望以鄭裕玲為目標，她說：「我參加第26期藝員訓練班入行，計埋實習至今拍超過30套劇，做過路人甲、妓女、?模，上年開始做有少少對白嘅角色，多數演寡婦，可能監製覺得我喊得Ok啦！我做嘢算認真，乜Job都唔推，拍劇試過做替身、被蟲『躝』上身。我都想多謝《東張西望》監製畀我加入大家庭，我入行係以做金牌司儀為目標，想似鄭裕玲咁全能，做司儀出色，拍《男親女愛》又好睇！」