舞台劇搬上大銀幕　朱紫嬈變電影女主角

歌手朱紫嬈到電台宣傳新碟《大愛紫嬈》，她表示今次是首次推出發燒碟，感恩公司給予機會出碟，新碟中更會有親自作曲作詞的歌，問到MV會否親自執導？她直言：「MV就唔會喇，我冇依方面嘅知識，等我管理好啲表情先。」提到去年重演舞台劇《那年五月》，她透露舞台劇重演一次後，更會搬上映大銀幕：「依部舞台劇係我第一部舞台劇，都係我第一次做女主角，好開心由舞台劇女主角變咗電影嘅女主角，自己對咩有信心我知，之前過到關，今次希望可以做之前做多啲功課。」她又大呻之前想做功課都沒有有機會，因為監製是《歡樂今宵》的監製黎文卓：「佢習慣午間綵排，晚上出街，我哋催咗幾次劇本都係一個月前先畀我，人哋做舞台劇排三個月日日練，我哋第一次做練咗三次就出街，重演練得一次，依啲經驗真係好難得。」她又笑言今次拍電影希望劇本會早些到手：「有嘢揸手都可以搵人幫吓手，不過都開心，多謝佢哋睇得起我。」而今次的電影更會原班出演，與廖偉雄、魯芬、張武孝等合作，預計九月開拍。