2003年港姐好命水　冠亞季相繼嫁人

戚黛黛2003年參加香港小姐成為季軍，原來當年同屆冠、亞軍都已經嫁咗人，佢哋分別就係已誕一仔一女嘅曹敏莉同成日同老公晒幸福嘅楊洛婷。

當年攞咗冠軍嘅曹敏莉，再出戰2004年華裔小姐，拎埋亞軍及「友誼小姐」。2010年，約滿無綫後，同年10月就下嫁金融才俊張家傑，並於翌年誕下一女，再於2013年誕下一子，過住幸福愉快嘅人妻生活。

而亞軍楊洛婷，就喺2014年嫁畀樂隊Dear Jane主音黃天翱（Tim）。二人結婚兩年，雖然未有小朋友，不過鬼妹仔性格嘅楊洛婷，就成日喺社交網站狂晒索爆泳照，又同老公攬實咀嘴勁投入，認真恨死隔籬。

另外，同屆仲有未嫁人嘅李施嬅，當年佢獲得「最上鏡小姐」及「才藝小姐」兩個獎項，依然威水。李施嬅曾同鄧健泓、胡杏兒老公Philip拍拖，又同過馬國明傳緋聞，不過依家都仍未遇到Mr. Right，但係有冠亞季軍做前車，相信佢都好快可以嫁人。