Ben Sir教講粗口　蓋世寶媽媽勁忙！

講粗口唔代表冇文化！粵語源遠流長，粗口可謂其中一大精髓。無綫節目《男人食堂》早前推出環節《粗口學堂》，搵嚟香港中文大學高級講師歐陽偉豪（Ben Sir）教粗口文化，反應熱烈，因而不斷添食。最新一課嘅《粗口學堂》再次受網民熱烈討論，片段喺網絡上瘋狂share，皆因今次Ben Sir趁住啱啱過咗嘅母親節，惡搞藝人蓋世寶嘅「老母」！

有上開網嘅人都知，喺Google搜尋只要一打「蓋世寶」三隻字，即刻彈出嚟嘅係「蓋世寶X老母」。到底呢個Term係點樣走出嚟？原來有一名網友以「蓋世寶X老母」為網名，大家純粹覺得幾押韻，而漸漸成為網絡潮語，但呢個Term本身冇任何意義嘅。至於Ben Sir喺《粗口學堂》上，講解緊粗口文化時，「真．蓋世寶」喺尾段突然殺出，即刻令人諗起呢句潮語。而身為「學員」嘅梁烈唯同麥美恩，仲勁押韻咁鬧對方係「離晒大譜蓋世寶」、「做嘢冇譜蓋世寶」、「鬼咁老土蓋世寶」、「頭大冇腦蓋世寶」……去到最後梁烈唯同學仲出絕招咁爆出「鍾愛老母梁烈唯」，始終忍住唔講粗口！呢一幕令唔少網民大讚蓋世寶大方，連自己「老母」都拎埋出嚟講笑：「拎埋阿媽出嚟客串，幾搞笑！」、「唔知伯母點睇呢？」

當然Ben Sir仲喺環節上講解咗唔少粗口嘅知識，例如粵語粗口同普通話粗口嘅分別，普通話粗口有三個「大將軍」，至於粵語粗口就只有一個「大將軍」，相信大家都明係邊一隻字。不過普通話嘅粗口「大將軍」，隻字本身係有其他意思，Ben Sir就話佢哋只係「Part time」做粗口，至於粵語粗口嘅唯一「大將軍」，隻字本身係冇其他意思，所以就係「Full time」粗口。網民個個大讚Ben Sir似足個冷面笑匠，如果畀佢教中文一定會笑死！

網民有話兒：

gxxx leung：Ben sir嘅「周星馳腔」講書好正！

olxxx chan：雖然一粒粗口都冇出現，但依然「粗口橫飛」。

mary cyxxx SY：唔洗（使）Mute都聽到粗口呀！

CHL gxxx：畀佢教書我中文唔會咁差啦～

swtxx LA：我睇到蓋世寶呢個笑咗出嚟