葛民輝Keep Fit照食好西

藝人葛民輝現身仁濟醫院出席全港賣旗日記者會時，透露今次特別獲仁濟醫院邀請設計旗章及慈善卡片套。阿葛直言今次義務做設計，又可以幫到人又可以過吓設計癮，不過親自設計都有好多嘢煩：「都要上廠了解㗎，一手一腳跟晒。（會再設計一系列慈善產品？）如果處理到都會考慮。」

另外，問到阿葛是否自從上次暈倒後都有繼續keep住身形，他笑言：「唔收錢唔會去Michael（健身教練）度，冇人要求大戰或者六舊腹肌，不過慣咗個飲食習慣，以前起身就做嘢做到夜晚先食一餐勁，食少啲會肥㗎。（冇得食好嘢？）不知幾多好嘢食呀，一餐半餐冇所謂，咁會應酬吓，飲吓酒，但唔係晚晚㗎嘛。」