【阻攔＋筐豬】光洙祖藍肉緊攬攬感情好

藝人王祖藍近日就同韓國綜藝節目《Running Man》主持等，拍攝內地版《奔跑吧兄弟》，之前佢仲喺微博透露過同韓版主持人感情幾好添。

李光洙認佗衰家

呢個組合就夠晒有火花喇，皆因王祖藍同李光洙分別喺《跑男》同《RM》都成日係大輸家，今次呢兩位Losers竟然喺埋同一組，結果，當然係好快出局啦！雖然真係唔知邊個拖累邊個，但觀乎李光洙喺微博上載同王祖藍頭貼頭嘅合照，然後留言：「王祖藍，對不起！」感覺上導致二人出局嘅「罪魁」應該就係光洙喇。

比賽第二　友誼第一

不過其實比賽嘅嘢只係其次，友誼先係第一。王祖藍見到光洙嘅留言，即時轉發兼留言：「大家好，我是阻攔，他是筐豬，我們是亞洲最受歡迎組合『黑洞』組合！」仲乘機大晒同其他韓版主持人嘅合照，見佢同個個都攬頭攬頸，唔使明言都知道佢哋感情唔錯！

而成件事仲有另一個亮點，就係由於光洙出名高，祖藍出名細粒，所以呢個組合嘅身高差距，亦成為唔少網友飯後嘅熱話。