Magic Gals拍夜蒲片　為劇情可以好性感

組合Magic Gals三位成員分別是楊穎妍（Icy）、盧婉婷（Neko）及劉芷盈（Mizer），除了主打魔術、跳舞和唱歌外，她們亦積極拓展電影事業，例如之前就曾客串《江湖喜劇》，跟譚詠麟（校長）、伍詠薇有對手戲，她們大讚兩位前輩親和：「之前都同伍姑娘合作過《喜愛夜蒲3》，佢完全冇明星架子，好玩得，會同我哋一齊講笑，校長就更加唔使講，係佢自己走埋嚟撩你講嘢，我哋未行過去，校長已經行入嚟我哋間房話『三小花呀你哋？』，因為我哋入面嘅角色係三小花，所以佢就入嚟望吓我哋，我哋仲集埋郵。」

唔怕被定位

她們亦透露稍後會拍攝關於夜蒲的電影，講到拍攝夜蒲電影很多時候都會衣着性感，問到性感底線去到哪裡？她們表示視乎劇情需要：「拍關於夜蒲嘅戲都預咗會有親熱戲、內衣、bikini，我哋可以接受，都係睇劇情需要，如果劇情冇啦啦要除哂衫，就覺得唔得。（三點盡露？）睇個劇情係咪要推到嗰個位。」講到她們之前也拍過夜蒲電影，問到可怕觀眾把她們定位行性感路線？她們坦言不擔心，因為自上次《喜愛夜蒲3》後，她們亦有演出不同角色，如Mizer之前則有份參與講述打羽毛球的電影，故不擔心形象被定格。

恨同S.H.E合作

至於在音樂方面，她們希望能用台灣組合S.H.E的歌曲做首串燒歌：「我哋視S.H.E為榜樣，想做到佢哋咁犀利，佢哋係亞洲天團，我哋都想喺香港成功外，亦可去亞洲其他地方發展。（有機會更想合作？）當然啦，夢寐以求。」至於講到同期有不同女子組合，問到視哪隊為勁敵？她們坦言：「唔好話勁敵，反而比較欣賞係As One，我哋三個一致認同佢哋嘅MV拍得好靚，就算live都跳得好齊，佢哋好努力，愈嚟愈進步，希望有機會合作或一齊進步。（想唔想好似FFx咁憑900蚊騎呢MV多人認識？）我哋都想咁樣爆紅，但做唔到，係佢哋跳先有呢種效果，我哋跳唔會有。」