梁兆明演《樓台會》向林家聲致敬

資深製作人丘亞葵（Vigo）近年製作過不少口碑載道的大型粵劇，亦積極發展粵劇文化，早前更獲政府委任為粵劇發展諮詢委員會成員之一。最近他的新製作，便邀請了粵劇紅伶梁兆明夥拍梨園後起之秀鄭雅琪，演出已故粵劇宗師林家聲首本名劇《樓台會》，並於今年8月中在新光戲院開鑼！

Vigo：會搞電腦效果

對於今次以新鮮的配搭演出著名劇作，Vigo表示：「梁兆明同我之前合作過《岳飛——八千里路雲和月》，當時已經想繼續合作，佢係梨園界首屈一指嘅文武生，今次跟新一代花旦鄭雅琪合作，應該可以擦出一啲不一樣嘅火花，而我哋亦會用電腦效果做一啲特別嘅製作，令大家有耳目一新嘅感覺。」

有幸獲名師親自教戲

曾任兩屆湛江粵劇團團長、亦是粵劇紅伶林錦堂徒弟的梁兆明，受訪時透露，原來他跟前輩林家聲有一段淵緣，他說：「十幾年前，我隨住其中一位師傅孔雀屏去加拿大多倫多登台，因為師傅同林家聲分屬好友，所以當晚請咗聲哥嚟睇，前輩好喜歡我嘅演出，之後請咗我去佢屋企，仲興之所至親自教我做戲，傾囊相授，當中包括《樓台會》及好多首本名曲，聲哥德高望重，今次我演繹佢嘅首本名作，一定會盡力做好。」