孖李嘉琪拍真人騷　麥貝夷有計劃出新歌

歌手麥貝夷（Karene）與師妹李嘉琪出席飲品店開幕，兩人表示早前出演了一個由該飲品店贊助的節目，更遠赴西班牙拍攝，Karene表示：「係一個真人騷加音樂加旅遊嘅節目，感受當地嘅感覺。」而本是創作歌手的李嘉琪更親自為節目創作：「唱咗四首自己歌，又有一首係拍節目時喺西班牙有感而作嘅歌，同另一個係好聲音嘅師姐一齊作，我哋兩個就唱為主，Karene就跳唱都有。」

自爆普通話麻麻

Karene又講到其中一幕要在風車拍攝：「景點同西班牙一個文學作品唐吉訶德有關，佢畀咗個任務我，話創作首歌要有依個元素，我就將飄零燕個故事改咗幾句歌詞。」她又笑言因為自己普通話一般，聽到攝影師皺晒眉：「可能覺得唔係好啱音咁，但大家都知我畀咗啲心機落去。」Karene又話有試過在西班牙街頭賣藝，結果賺到1歐羅，超級滿足。

兩人又表示將會推出新歌，李嘉琪表示希望同Karene合作，自己亦會出EP，而Karene就指有出歌計劃，不過一切仍是秘密：「但我依排好努力學跳舞同埋做戲，希望17年會有個全新嘅自己。」