名人：Hilary自揭同男友分手真相

名媛上山詩鈉（Anna）的19歲囡囡Hilary，以嘉賓身分出席跳舞學校周年慶典，她表示由美國返港約一星期，趁暑假期間接工作搵零用錢：「讀書、住宿都要使費，幫補吓媽咪。（媽咪贊成你出嚟做嘢？）佢冇乜所謂，我依家都唔知第時想做咩，畢業再諗，3年後先畢業，依家咩都試吓先。（咁對娛樂圈冇冇興趣？）Ok嘅，出嚟可以識吓唔同嘅人都Ok，之後想點就未知。」

否認有新歡

問到早前跟男友分手的Hilary，暑假返港是否不想留在美國觸景傷情？她說：「唔係。（返香港散心？）唔使散心。（搵到新目標？）咁又唔係。（之前Instagram上攬嘅男仔唔係新男友？）全部都係朋友，依家冇人追。（咁暑假咪好悶？）冇咁諗，我會同媽咪去街，或者出Trip去搵朋友。（點解之前咁穩定會突然分手？）因為返去（美國）唔啱，其實都拍咗兩年，冇乜所謂，依家仲係朋友，Ok，又唔係去到見到大家，好憎大家、唔同大家講嘢，所以冇所謂，仲有聯絡。」又謂未知往後有甚麼工作。

未必接比堅尼Job

問到經常在網上大晒比堅尼照，有否接到比堅尼工作？她說：「冇喎。（你ok？）睇吓啦，未必Ok，呢啲係我自己去旅行嘅相，唔係特登Show。」