黎明反感被嗌金句王:有看不起的感覺

20160526
東網電視
更多新聞短片
黎明對於被嗌「金句王」表示反感。

天王黎明因早排開4D騷一事,深得全港民心,去到邊都被討論,而最近首次出演內地真人騷《非凡搭檔》嘅佢,罕有地接受內地傳媒訪問,連佢自己都話係「人生第一次」。出名係金句王嘅佢,接受訪問時亦繼續大講哲學同金句,問到佢點解參加真人騷,佢就話:「對我來講,可以跟一些我從來沒見過的人一起合作,是人生一個經歷,我覺得我的人生也需要這麼一個經歷。」認真有哲學意味!

解釋常去廁所原因

而真人騷播出後,黎明被指形象顛覆兼行動媛慢,兼成日去廁所被網民笑指腎唔好,更話真人騷令天王黎明落咗「神台」啦!而一向豁達嘅佢對於網民指佢「天王下神台」一事表示唔在意,又話冇權力去阻止網民點睇佢,而佢亦話自己唔留意微博同微信。不過對於成日去廁所呢個位,佢就有解釋到啦,原因係因為太早起身飲太多咖啡所致!

「金句王」自覺被笑

至於對於「金句王」呢個稱呼,黎明原來係有啲反感,因為佢覺得「金句王」係一個貶義嘅稱呼,佢話:「我把普通話的文法,混合了廣東話的文法,把它變成可以想像的東西,他們覺得不太習慣,因為我跟大家說話的方式不太一樣,『金句王』就是有看不起你、笑你的感覺。」訪問期間,有人提到「金句王」其實係指講嘢夠犀利、到位兼有哲理,但黎明唔認同,反而係覺得大家眨緊佢,認為佢精神有啲問題兼唔正常。