周永恒嬲爆反擊冇不良嗜好：我八舊腹肌

藝人周永恒（Roy）以娛樂文化集團業務總經理身份，出席電影《男神最痛》記者會，被指遭阿Roy辱罵而嗌分手的女友黃芊詠（Cherie），亦以白色ONE PIECE裙透深色Bra現身撐場，粉碎分手傳言。

拖女友晒愛

阿Roy偕女友及娛樂文化集執行董事梁奕藍齊齊受訪。阿Roy被問到盛傳分手，他手搭女友膊頭說：「咩話？近排我阿媽話有好多用佢（女友）張相同名嘅人Add佢，一個禮拜有4、5個，真係有4、5個Cherie我又唔拘，人哋要講咩我控制唔到，集中番喺工作上面，嚟緊工作唔簡單。」

澄清冇截圖對話

對於有指有Roy與Cherie對話截圖流出，Roy說：「我哋冇嗰啲對話，肯定唔係！雖然佢有時唔聽話，畢竟我年紀大過佢，我好似佢師傅咁，但未至於去到咁樣，唉，我唔想提，唔想太多回應，想集中番喺今日記者會度啦！」

力證感情冇變

Roy對被指再染不良嗜好，即嬲爆表示：「咩呀？我都叫啲人摷番以前啲報道，邊個唔知我細個犯過有不良嗜好嘅錯誤，來來去去話我唔係同女朋友嗌交，就係話有不良嗜好，我諗係時候講電影、夢想，我八舊腹肌，點會掂嗰啲嘢，亦都好忙，好多嘢做。（同女友感情冇變？）冇變，事實擺在眼前，但阻止唔到人哋點睇，大家用眼睇囉！」

讚女友好堅強

Cherie被問到有否為分手傳言不開心，她說：「咁又冇，都唔係事實，點解要唔開心？」Roy讚女友說：「佢好堅強，佢好適合做呢行，面對傳媒壓力會安慰番我轉頭，佢都好叻嘅。（公司會力捧佢？）我本人都力捧佢，公司會唔會就要問番老闆。」

梁奕藍幫口說：「我哋都希望多啲機會畀新人，Cherie係新人，而且有潛質，希望有佢發展嘅地方，嚟近佢會有啲音樂會出嘅！」