陳敏之聞宣傳新片走光：千祈咪畀老公知

陳敏之、陳嘉佳（細細粒）及沈振軒等錄影節目《男人食堂》。日前於黃埔違例泊車被鎖車的細細粒姍姍來遲，結果被主持許紹雄取笑：「佢去咗黃埔交罰款...買咗個生果藍去黃埔道歉呀！」搞到細細粒靦腆非常。

細細粒知錯「企定」被鬧

問到細細粒可知道事件引起網民討論及指責她，她似不欲多談：「總之唔啱就要企定畀人鬧。（拍咗片道歉？）我用第三身份去鬧細細粒，然後再道歉，呢件事為網民同我都留下深刻印象。」

陳敏之乘機放閃

至於陳敏之日前參於新劇《性在有情》宣傳時不慎走光，她笑說：「呢排冇睇新聞，依家先知，千祈唔好畀老公知呀，咁肉酸，真係兒童不宜。可能我好耐冇着呢啲衫（性感內衣）宣傳，做咗個咁香艷嘅動作，又唔夠你哋（記者）快，下次小心啲。」

她又指錄影《男》節目會提及夫妻相處之道，乘機放閃謂：「我同老公真係冇鬧過交，互相包容囉，佢包容我急躁，我就包容佢食煙，最重要係相處舒服啫。」談到同事曾守明因病暴瘦，敏之謂：「人有自愈能力，畀啲時間佢，最緊要保持心境開朗。」