收工返京湊女　羅嘉良拍無綫劇學到嘢

藝人羅嘉良（撈家）、李佳芯（Ali）及鄭俊弘（Fred）到清水灣郊野公園，為無綫新劇《與諜同謀》拍外景，天氣報告指氣溫高達攝氏32度，但Fred仍有十多名女Fans專程前來探望偶像，認真有心。

撈家表示拍完今日的戲份後就可以返北京與家人團聚：「呢個外景之前因為大雨改期，今日終於天公造美拍到，天氣非常好，係曬啲。我拍埋今日，戲份完晒，聽日就返內地，返咗嚟幾個月，喺4月個女生日返咗去幾日，個女成日問：『爸爸，甚麼時候回來？』我返到去都要抖番吓。」

讚90年代演員好強

撈家又指今次回巢拍劇，TVB在時間上安排得很好：「我要求要有休息時間，同埋開廠景就唔好再開外景，基本上都做到，好感激監製，有其他監製問我可唔可以一年返嚟拍兩部，其實我一年返嚟拍一部都難預到時間，始終老婆同個女喺北京。」

撈家將為新劇唱主題曲，他說：「原來依家TVB有自己嘅錄音室，我都第一次去。（歌曲版權點計？）其實有機會畀我唱已經好好！（想同之前偶遇嘅蔡少芬再合作？）嗰次我仲以為佢同楊怡約埋，但如果再拍就真係要睇時間，90年代嗰時嘅演員真係好強，邊種演員都拍得，今次返嚟多咗新人，有啲我返嚟之前都唔係咁認識，同佢哋合作我都睇到、學到好多，佢哋好有活力，對我嚟講都係一種學習。」