朱晨麗連拍兩劇不停死　太慘情抽離唔到

無綫花旦朱晨麗（阿朱）有份參與的劇集《EU超時任務》及《末代御醫》早前同期播出，雖然一套古裝劇、一套時裝劇，但共通點均是以死收場，前者飾演末期癌症病人，由於故事講述穿越時空，故拍攝期間要不斷死，後者飾演妃子，惟最後也要跳井自盡，阿朱笑指前輩羅樂林曾於播出劇集一日死多次，故有意成為女版羅樂林，挑戰對方為角色死得最多的紀錄。

太投入抽離唔到

談到拍攝兩劇的難忘事，阿朱首推《末》劇，透露曾為角色慘情渲染，因而一度走不出來，她謂:「嗰時兩套劇一齊拍，心態係一樣都係唔開心，所以當做番朱晨麗時就脫離唔到，記得拍拍吓要幫另一套劇配音，點知句對白應該係好輕鬆，但我就講到好灰嘅，好在當時前輩黃淑儀喺度，有提醒叫我輕鬆啲表達好啲，我當堂醒晒！（嗰段時間痛苦？）成個人好似唔想同人講嘢，鍾意自己暱埋，以前可以練到唔會喊，但拍完套劇之後係咪都喊。」更指拍攝一場投井戲份，由於不諳水性，再加上水深，結果浸了一個早上浸到皺皮之餘，還喝下不少污濁水，更謂：「因為要好真實咁掙扎，工作人員用腳踩住我兩隻腳，我浸落去咪係咁飲水，好辛苦，拍完全身都皮膚敏感，耳仔入咗水，鼻又好唔舒服，下次都係咪搞。」

拍單立文如上演技訓練班

至於《EU》就要素顏上陣，為配合角色患重病，阿朱特別把聲線調較，走路時也像老人家般，與單立文合演夫妻的她，笑指對方乃搞笑能手，故拍攝一些沉重戲份時，單立文會講爛gag來緩和氣氛，阿朱謂：「之前佢做我老豆，今次做我老公，大家有晒默契，所以氣氛好愉快，但當role機時大家又要即刻變臉，所以都多得佢，令我上咗速成演技訓練班咁。」

場地:香港觀塘帝盛酒店

化妝:Raymond Yip