就快32歲！鍾舒漫認畀父母催拍拖

歌手鍾舒漫（Sherman）與陳詩欣出席香港區樹林護理及種植日的揭幕儀式，Sherman謂之前參加過植樹活動，覺得最重要的是傳遞環保的信息：「平時我都算OK環保，阿妹（鍾舒祺）會話我係垃圾婆，鍾意循環再用啲垃圾同分類，同埋有時我都幾嚴重，我見到媽咪掉咗膠嘅嘢，我會睇唔過眼，執番拎去分類。」

父母緊張介紹仔仔

講到Sherman本月20號將踏入32歲生日，她表示或會與家人一起遊船河慶祝：「天時咁熱要去吹吓海風。（冇男仔約你？）冇喎，有都係識咗好耐嗰啲，另外平時都有朋友介紹人畀我識，我都唔抗拒嘅。」又笑謂不覺得自己似32歲，因為她的心境充滿童真：「我心態好小朋友，好有童真，所以先同到我阿妹拍咁多低能嘢，年紀對我唔太緊要，但保養係重要啲。」問到家人可有催她找另一半？她坦言今年開始被家人催促：「媽媽比較緊張小小，我都同佢講放心啦，我唔會冇人娶。（父母介紹朋友啲仔畀你？）有，同埋都好着緊你有冇同人繼續接觸，我叫佢唔使咁緊張，咁樣會搞到人唔好意思。」

撐老友冇做小三

提到她的形象指導師Bird Tse被指介入洪永城與唐詩詠的戀情，Sherman表示有看到報道，為對方感不值：「我好熟佢份人，知道佢肯定唔係咁嘅人，我敢寫包單。佢係我識嘅朋友之中最傻更更嘅一個，有時佢擺上網嘅嘢冇諗得咁多，可能因為佢覺得自己普通人一個，唔係咩公眾人物，我事後都有同佢講要小心。」又指知道Bird曾對事件感困擾，自己亦有安慰她，大家得啖笑。