許嘉浩爆娛圈黑暗面 騙案雙面人樣樣齊
「綠魔」許嘉浩(Karl)於ViuTV節目《晚吹-總有一隻係左近》裏接受主持陳淑蘭(蘭子)的訪問,二人於節目內大談圈中的「黑心鬼」。Karl自爆去年曾為選美活動擔任幕後工作,眼見負責管理佳麗的保姆對不聽話的佳麗灑上痕粉作整蠱:「可能有選美女仔唔聽話或者唔肯同老闆去應酬,就畀人灑痕粉。」他又不開名地大爆曾眼見一位目前仍活躍於娛圈的一線女星冷待粉絲:「佢出道十年,我有次撞到佢離開電台前同助手夾定,佢話『唔駛理fans,你叫定司機喺門口等我。』佢出到去畀記者影相後就走,仲話係助手唔畀佢停低,有fans跌低佢都照走。」Karl又言曾見過化名為「腐皮卷」的藝人扮善心捐錢後「變臉」:「兩年前喺銅鑼灣一個商場記者會現場有身體痙攣的坐輪椅人士,『腐皮卷』行街見到有人影相就去捐一百蚊,影完相一分鐘後就見到佢叫助手攞消毒紙巾畀佢抹手。」

網絡欺凌影響力大

Karl又提起早前𡃁模伍淑怡(Yoyo)因捲入裸照風波而割脈尋短見一事,去探討網絡欺凌問題。他說:「攝影師呃佢,將佢三點全露嘅相唔止擺上網,仲賣畀色情網站同send畀朋友。網民留言話佢家人都知,今次佢仲唔死。令Yoyo抵唔住壓力喺天台自殺,好彩佢畀人救得番。」

知人慘事勁心涼

至於蘭子就自嘲可能不知不覺成為「黑心鬼」:「我識過好差、好差、好差嘅人,心裏面會詛咒佢。當時我行街就對住個廟話『鬼唔望佢輸10億』,結果過咗一排我家有喪事,我隻狗死咗,我喊緊就收到電話有人話我知嗰個人輸咗9.7億。我流緊眼淚,但個嘴就雨後陽光咁笑,感覺心涼。」