相隔逾十載再踏舞台　劉志遠成焦點

Beyond成員葉世榮、黃貫中（Paul）、劉志遠（前Beyond成員）為本周五《家駒…愛心延續慈善演唱會2016》於錄音室進行綵排，即場排練Beyond經典名曲《光輝歲月》。

世榮感謝遠仔專程從台灣回港參與演出；而過去兩年均在台灣工作的遠仔，則謂會趁今次返港見家人及齊齊過端午節。遠仔稱至少已有十多年未有踏上舞台，問到感覺如何，遠仔謂：「好緊張，其實同佢哋好熟，但感覺又好陌生。」世榮和Paul則取笑遠仔一向慢熱。

問到Paul可知胞弟將座駕借給友人，友人卻發生撞車事故，Paul表示：「未得閒理佢。（你有冇借車畀朋友經驗？）成日都有借，最緊要個人冇事，當年都有借車畀遠仔。」遠仔聞言笑謂：「係呀，揸揸吓要入油站，唔係入油係入水，冇水爆水缸，噴晒白煙。」 Paul笑謂：「都係嗰句最緊要個人冇事。」

世榮記錯父親節日子

談到世榮和阿Paul已為人父，問到父親節如何慶祝，Paul笑道：「世界唔係只有母親節嘅咩？乜有父親節㗎？邊有人理吖!」在旁的世榮更搞笑說：「我仲以為啱啱過去嘅周日係父親節，打去畀太太叫佢幫我同外父講聲父親節快樂，點知外父話都未到！」世榮表示完騷後，會和太太返回北京過節。