感激教誨　文詠珊唔覺跟黎明冇運行

由伍詠薇主持的有線娛樂台節目《伍姑娘真識食》請來文詠珊（Janice Man）擔任嘉賓，大談由嫩模變成實力派演員的經過，又分享新戲的挑戰。

同黎明合作融洽

講到年前獲黎明（Leon）賞識簽為藝人，但被認為該段時期發展平平，JM並不認同：「我同Leon團隊合作好融洽，只係在工作上公司同我有不同考慮，當年我仲係新人，有好多嘢想試，曾經有接拍內地電視劇嘅機會，雖然唔係重要嘅角色，但我都好想試吓，汲取經驗。不過公司希望幫我爭取最好嘅演出先應承，最後我都尊重公司決定。」

節目中，伍姑娘又向JM逼供：「如果你要餵一個男同事飲『不能說的藥水』，令佢以後講唔到嘢，你會揀邊個？」JM笑言：「可能係Leon，以前我同佢共事時，佢成日分享好多人生道理，教我好多嘢，係一個好風趣幽默嘅人，不過如果我封佢口，唔畀佢講金句，可能網民會打我。」

大陸拍戲被叫小三

講到在新戲中有大膽赤裸演出，JM坦言要打破自己關口：「我掙扎咗好耐，一來今次性感係破咗自己底線，二來好擔心自己演唔好個角色，波動嘅情緒持續咗成個月，壓力大到晚晚失眠。」她慶幸自己天性樂觀，最後才能抽離角色！而JM近年開始進軍大陸市場，但原來曾經歷不少瘀事：「記得有次我去國內拍戲，我見大家鍾意喺自己個名前加『小』字相稱，於是我叫大家稱呼我做『小珊』！點知國語『小珊』同『小三』係同音，大家以為我自稱『小三』，笑到收唔到聲，好尷尬！」