【解答網民】吳啟華爆響口認係不死人

20160613
東網電視
更多新聞短片
吳啟華自揭謎底,話佢其實係由元朝活到現代,係700幾歲嘅不死人。

藝人吳啟華喺無綫劇《純熟意外》中不時穿越時空,以古裝同西裝亮相。加上喺第六集佢遇上車禍全身沾血,竟然唔死得自行返屋企養傷,難怪網友都話佢係不死人,仲笑言係劇集《殭》當中仍未開估的四個不死人的身份。網友仲話吳啟華係「刑活著」的朋友「刑在生」,又話似韓劇《來自星星的你》中的「都敏俊」。

下星期交代真正身份

對呢個不死嘅角色,吳啟華終於自揭謎底,話佢其實係由元朝活到現代,係700幾歲嘅不死人,而劇情仲會喺下星期交代角色嘅真正身份。佢接受《東網》訪問時表示:「角色講我由元朝生存到依家,當年係公主李施樺畀咗我食長生不老藥,當中經歷好多生離死別,其實好苦!(似鄭嘉穎?)我冇睇過。(似都敏俊?)我只係有自愈能力,冇佢咁犀利有超能力,角色唔似,佢咁小鮮肉,我MAN啲。」而監製陳耀全則表示構思呢部劇時冇諗過《來》劇。

為守秘密謝絕探班

啟華表示演出呢個角色嗰陣,一直緊守「不死身」嘅秘密而謝絕探班,佢搞笑話守秘密相當辛苦,不過,角色造型之多,包括多個古裝造型都係佢從演以嚟嘅最愛。佢認為今次無論造型同個人狀態都係最好嘅,仲特別多謝監製陳耀全嘅悉心打造。