指原莉乃兩連霸做一姐　呻冇人工加

日本女子組合AKB48家族「第8屆人氣總選」昨日正式完滿結束，上屆一姐指原莉乃，今年第三度登頂，打破紀錄成為首個成功兩連霸嘅成員，佢喺總選後受訪，透露雖然前一姐大島優子同前田敦子都未試過兩連霸，但就唔覺得超越咗佢哋：「如果即刻有人搵我主演電視劇嘅話都可能會覺得自己超越敦子同優子，但我依家都只係做緊同之前一模一樣嘅工作。」

指原承諾今年再度封冠，會喺演唱會上即場換水着，並會讓諧星大整蠱將佢推落放滿熱水嘅浴缸入面。而指原以大比數抛離死敵渡邊麻友，佢就強調同麻友冇不和，私下其實好老友。指原又表示由佢嚟打破紀錄，覺得唔好意思，並想向AKB監製秋元康道歉，不過佢轉頭又大呻就算再做一姐薪金都唔會上升。