與王敏德咀足4次　馬詩慧自爆千杯不醉

藝人王敏德（Michael）推出自家品牌威士忌，獲一家到場支持，他與名模老婆馬詩慧（Janet）更咀嘴4次，非常溫馨，期間Janet更疑似眼濕濕！問到Janet是否感動得眼濕濕？她表示：「唔係，燈光啫，佢咀得好出力。」

結婚出酒紀念

Michael透露自己於蘇格蘭的私人酒莊選出該威士忌，釀製年份為1981年，達35年酒齡。是次共推出228枝威士忌，今晚將開10至15枝，讓親友品酒。問到為何選1981年？他說：「我第一次嚟香港係34、35年前，同埋35年嘅酒喺市場上比較少見。（會唔會推出酒嚟慶祝結婚周年紀念？）你講咗我嘅驚喜出嚟，下年我哋結婚25周年，可能會出酒。」

王敏德飲酒唔識停

問到Janet Michael於酒後曾否吐真言？Janet笑言：「佢酒後瞓咗。（你自己醉咗會點？）我千杯不醉。其實係唔會飲太多，識得停。」在旁的Michael即大讚：「佢好叻，識停，我唔識。（你有冇醉到攬住Janet？）冇。」Janet即笑言他可以攬着別的女生。問到Michael醉後曾否做過瘋狂的事？他笑言自己會靜雞雞返回房間睡覺，Janet即笑言全因Michael怕被她發現。

仔仔分手唔開心

另外，提到兒子王躍穎與女友分手，Janet表示已分開一段時間，但她作為局外人，不多回應，免得兒子怨她爆他私人事。問到兒子有否表現傷心？她坦言：「唔開心一定有，因為今次係佢第一次比較認真嘅拍拖。（你拆散？）唔係，我係咁嘅人咩。佢哋大個啦，唔可以次次都我做代言人。」