賓佬談「漏氣門」爆粗　口齒不清疑醉酒

荷里活男星賓艾佛力（Ben Affleck)日前上主持Bill Simmons最新清談節目《Any Given Wednesday》，兩個談及早前美式足球聯賽（NFL)發生嘅「漏氣門」（Deflategate）事件，賓佬即刻勁火滾，全程連環爆粗喪鬧，似是作為「新英格蘭愛國者隊」粉絲嘅佢為四分衞Tom Brady被判罰停賽四場感到唔公平，認為大家對Tom嘅抨擊太苛刻：「這是體育界極度垃圾及令人XX火滾嘅事！我同X過美式足球員傾過，專業嘅美式足球員，佢哋都覺得件事好XX！」

賓佬全程勁好火，幾乎有佢講冇Bill講咁濟，仲講到自己面紅耳熱，嬲起上嚟說話口齒不清，好多網民睇完都懷疑佢喺節目飲醉酒。不過亦有指賓佬冇飲酒冇吸毒，只係錄影前已經同Bill討論到好有火，先至搞到佢正式錄影咁火爆。另有網民嘲笑賓佬如果做戲咁出力，一早拎咗左奧斯卡影帝。