傳李克勤強勢加盟!林峯賣口乖狂讚英皇

20160623
東網電視
更多新聞短片
點樣先至可以得公司寵?學吓林峯(右圖)就知啦。
藝人林峯出席港鐵「開心搭.生日獎」抽獎活動,提到他年頭到港鐵站巡視演唱會燈牌時不懂用新款單程飛,他笑言自己是大鄉里:「我真係唔知可以嘟,同埋我見到港鐵多咗好多舖頭,仲有salon!」問到平日如何慶祝生日?林峯指多數在工作中或與粉絲度過:「我每年都呼籲佢哋唔好送禮物畀我,有時聚會完,我要另外book架車載禮物,所以會叫佢哋唔好花費,或者(最好)攞去捐,我最開心就係收佢哋捐錢做慈善嘅收據。」
為港鐵錄聲帶
之後,林峯與港鐵公司商務總之楊美珍女士即席抽出7月份搭港鐵生日優惠的幸運日子為7月12日,楊美珍女士更預告下月為港鐵進行抽獎的將會是容祖兒,又指林峯與其他藝人會為港鐵錄一段聲帶,並安排在繁忙時間播放。而林峯就獲贈他在內地劇集《六扇門》中的造型氣球公仔、羊年紀念車飛及全年無限次搭港鐵的車飛。
搭港鐵唔使「變身」
受訪時,林峯承認過往少搭港鐵,但在繁忙時間都會搭港鐵過海:「我會由尖沙咀搭去金鐘,搭一個站。(會戴晒帽?)唔使,我照行,我都係香港市民嚟。(會畀人圍住?)唔會,大家都非常禮貌,最多望完話『幾似林峯喎』,我就會話『好多人都咁講』。」又指之後會多搭港鐵,聽自己為港鐵所錄的聲帶:「最好個個站都播晒啦。(內容?)就係話繁忙時間希望大家有啲耐性,耐心等候嗰啲。」
檔期排滿至明年
提到無綫金牌監製李添勝表示遺憾未能與他合作,林峯指有在微博上多謝對方的評價:「我都一路希望同佢合作,眾所周知佢係非常好嘅監製,好多作品都係經典,但我都知佢呢段時間要休息,希望之後仲有機會(合作)。」問到可會回無綫拍劇?他指7月底回內地拍攝完民初劇後,仍有2部劇集接洽中,而明年更要舉行巡迴演唱會:「我個期都排到出年年底,所以要睇時間。」
唔怕被搶資源
對於有指李克勤約滿環球後將過檔英皇,林峯說:「唔係真嘅咩?」問到可擔心被分薄資源?他說:「唔會,我哋公司多資源,唔會有呢個問題,同埋我哋啲歌路唔同,我哋公司啲artist都有自己嘅風格同擅長嘅嘢,大家都可以獨當一面。」又指多年來與克勤只合作過一次,就是在活動上同台合唱一首國語劇集主題曲。